UBUNGE TABORA MJINI, BANDORA MIRAMBO USO KWA USO NA MH ADEN RAGE

Bandora Salum Mirambo akiwasilia katika ofisi za CCM wilaya ya Tabora kuchukua fomu za ubunge wa Tabora mjini.

Wagombea ubunge wa jimbo la Tabora mjini kwa tiketi ya Chama cha Mapinduzi CCM Mh Aden Rage na Bandora Mirambo hii leo walikutana uso kwa uso walipofika ofisi za CCM wilaya kuchukua fomu za kuwania kuteuliwa na chama hicho kugombea ubunge wa Tabora mjini. 

Wote wawili katika kuonesha siasa si chuki wala ugomvi walilakiana na kusalimiana kwa uzuri kabisa.

Wawania kuteuliwa na CCM wakisabahiana

 

Mh Aden Rage ndiye mbunge aliyemaliza muda wa ubunge wa Tabora mjiini ambapo alishinda ubunge huo mwaka 2010 kwa kumuangusha kwenye kura za maoni ndani ya CCM aliyekuwa mbunge wa jimbo hilo kuanzia mwaka 2005 marehemu Siraju Kaboyonga ambaye naye alimshinda Henry Mgombe mwaka 2005 aliyekuwa mbunge mwaka 2000 .

 

Hali hii imeonesha kuwa wapiga kura wa Tabora wamekuwa na tabia ya kutorudisha mbunge katika kiti hicho kwa mara ya pili mfululizo, Mh Rage ambaye alipata kuwa mwenyekiti klabu cha Simba cha jijini Dar bila shaka atakuwa na kibarua kigumu cha kuuvunja mwiko huo.

 

Bandora Mirambo ni mkurugenzi wa kampuni ya ulinzi ya Salu yenye makao yake makuu mjini Shinyanga na matawi kadhaa mikoa ya kanda ya ziwa.

Tabasamu kubwa!