KUFUZU KWA EURO 2016, UINGEREZA YAITANDIKA SAN MARINO 5-0 WAKATI HISPANIA IKILALA KWA SLOVAKIA 2-1

Timu ya soka ya taifa ya Uingereza imeishushia kipigo kikali timu ya taifa ya San Marino cha jumla ya mabao 5-0 katika mchezo wa kuwania kufuzu kwa fainali za mataifa Ulaya 2016 mchezo uliochezwa katika uwanja wa Wembley. 

Katika mchezo huo, wenyeji walionekana kuonana zaidi na kucheza kitimu na kujikuta wanamaliza dakika 90 wakiwa na ushindi huo mnono ulifufua matumaini ya mashabiki wa soka wa Uingereza ambao hawana imani sana na timu yao katika michuano ya kimataifa.

Mabao ya Uingereza yaliwekwa kimiani na wachezaji Phil Jagielka aliyefunga bao la kwanza katika dakika ya 24, bao la pili likafungwa na Wayne Rooney kwa mkwaju wa penati katika dakika ya 43. 

Bao la tatu liliwekwa kimiani na mshambuliaji mwenye kasi sana uwanjani Danny Welbeck katika dakika ya 49, bao la nne lilifungwa na Andros Townsend 72, wakati bao la tano likiwekwa kimiani na beki wa San Marino Allesandro Della Valle katika dakika ya 78 wakati akiwa katika harakati za kuokoa.

Matokeo mengine ya mechi zilizochezwa jana usiku za kuwania kufuzu kwa Euro 2016:-

Sweeden 1 vs 1 Urusi

Slovakia 2 vs 1 Hispania

Slovenia 1 vs  0 Uswisi