FAINALI ZA MATAIFA YA AFRIKA, TUNISIA YAITANDIKA ZAMBIA 2-1 KWA MBINDE

Timu ya soka ya taifa ya Tunisia ilibidi ipigane kufa na kupona uwanjani na kufanikiwa kuibuka na ushindi wa mabao 2-1 dhidi ya Zambia katika mchezo wa kundi B wa kuwania kombe la Mataifa Afrika. 

Katika mchezo huo, Zambia ndio waliokuwa wa kwanza kupata bao katika dakika ya 59 ya kipindi cha pili, bao lililofungwa na Emmanuel Mayuka. 

Timu zote zilionekana kutandaza soka safi na Zambia kuwa wanafanya mashambulizi ya kushtukiza langoni mwa Tunisia. 

Hata hivyo dakika ya 70 Tunisia walifanikiwa kupata bao la kusawazisha likifungwa na Ahmed Akaichi na baadaye Yasine Chikhaoui akaipatia Tunisa bao la pili nala ushindi katika dakika ya 88. 

Kwa matokeo hayo Tunisia ndio vinara wa kundi hilo wakiwa na pointi 4.