SAKATA LA ESCROW: VIGOGO WAWILI WA SERIKALI WAPANDISHWA MAHAKAMANI LEO

Taasisi ya Kuzuia na Kupambana na Rushwa nchini Tanzania (PCCB), leo imewafikisha katika mahakama ya Hakimu Mkazi Kisutu jijini Dar es Salaam, watumishi wawili waaandamizi wa umma kwa tuhuma za kuhusika na rushwa katika sakata la ufisadi katika akaunti ya Tegeta Escrow.

Watuhumiwa hao ni pamoja na aliyekuwa Mkurugenzi wa Sheria wa Wizara ya Ardhi, Nyumba na Maendeleo ya Makazi Bw. Teophil John, anayetuhumiwa kupokea fedha za Tanzania shilingi milioni 161.4 kutoka kwa mfanyabiashara Bw. James Rugemarila, fedha zinazodaiwa kuwa zilitolewa katika mazingira ya rushwa.

Mtuhumiwa mwingine ni Bw. Rugonzibwa Teophil ambaye ni Mhandisi Mwandamizi kutoka Wakala wa Nishati Vijijini (REA), ambaye kwa mujibu wa hati ya mashtaka, yeye anatuhumiwa kupokea fedha shilingi milioni 323, kutoka kwa Bw. James Rugemarila pia katika mazingira yanayodhaniwa kuwa ni ya rushwa.