KAULI ZA MVUTANO WA TUME YA UCHAGUZI KENYA WATAWALA SHEREHE ZA SIKU YA MADARAKA KENYA

Rais Uhuru Kenyatta amewahutubia wakenya katika maadhimisho ya Siku ya Madaraka Mjini Nakuru na kuwataka kuwahofia viongozi wanaotaka kukiuka Katiba ili kufanikisha agenda zao binafsi.

Rais Kenyatta amesema viongozi lazima waheshimu taasisi zote zilizowekwa na Katiba kuanzia uongozi wake na namna zinavyoendesha shughuli zake nchini, kauli ambayo inaonyesha kuwalenga wapinzani wanaotaka ivunjwe tume ya uchaguzi IEBC.

Wakati huo huo katika mkutano mwingine wa Siku ya Madaraka Jijini Nairobi, kiongozi wa upinzani Raila Odinga amesema hakutakuwapo uchaguzi mkuu mwaka 2017 iwapo maafisa wa sasa wa tume ya uchaguzi hawatoondoka.

Wakihutubia maelfu ya wafuasi wake Uhuru Park, Raila na Moses Wetangula wamesema watataja majina ya wawakilishi wao kesho, watakaoungana na serikali katika mazungumzo kuhusina na mvutano wa uwepo wa tume ya uchaguzi.