UJERUMANI YAICHAKAZA MEXICO NA KUTINGA FAINALI YA KOMBE LA MABARA

Mchezaji Leon Goretzka amefunga magoli mawili ndani ya dakika nane za mwanzo wa mchezo wakati Ujerumani ikiifunga Mexico magoli 4-1 katika dimba la Sochi na kukata tiketi ya kuchuana na Chile katika fainali ya Kombe la Mabara.

Kiungo huyo wa Schalke alifunga goli la kwanza akinasa pasi ya Benjamin Henrichs na kufunga kwa umbali wa yadi 20 na kisha baadaye kuongeza goli la pili kupitia pande alilopenyezewa na Timo Werner.

Werner baadaye akaifungia Ujerumani goli la tatu kupitia pasi ya Jonas Hector, kabla ya Marco Fabian kufunga kiufundi goli pekee la Mexico kwa shuti kali la umbali wa yadi 35. Amin Younes kuongeza goli la nne la Ujerumani.

                         Leon Goretzka akifunga goli lake la kwanza katika mchezo wa jana

          Mpira uliopigwa na Marco Fabian ukimshinda kipa wa Ujerumani na kujaa wavuni

             Amin Younes akifunga goli la nne la Ujerumani na kupigilia msumari wa mwisho