TUME YA HAKI ZA BINADAMU NA UTAWALA
BORA
Kitalu Na. 8, Mtaa wa Luthuli
S.L.P 2643, DAR ES SALAAM
Simu: +255 22 2135747/8; 2137125;
2135222
Faksi: +255 22 2111281
Barua Pepe: chragg@chragg.go.tz
Tovuti: www.chragg.go.tz
|
Oktoba 29,
2015
TAARIFA KWA VYOMBO VYA HABARI
Tamko kuhusu ushauri wa Tume ya Haki
za Binadamu na Utawala Bora kwa Tume ya Uchaguzi Zanzibar
1.
Tume ya Haki
za Binadamu na Utawala Bora (THBUB) inapenda kueleza kuwa imepokea tangazo la
Mhe. Jecha Salim Jecha, Mwenyekiti wa Tume ya Uchaguzi Zanzibar (ZEC),
alilolitoa jana tarehe 28 Oktoba 2015 kupitia vyombo vya habari, kuhusu kufuta
matokeo ya uchaguzi uliofanyika Zanzibar tarehe 25 Oktoba 2015, na kuahirisha
mchakato mzima wa uchaguzi hadi hapo taarifa itakapotolewa tena.
2.
Tume (THBUB)
imepitia tamko la Mwenyekiti Jecha kwa makini na kulifanyia uchambuzi kwa
kuzingatia misingi ya haki za binadamu na utawala bora, kama ilivyoainishwa
katika Katiba ya Jamhuri ya Muungano wa Tanzania ya mwaka 1977 na Katiba ya
Zanzibar ya mwaka 1984.
3.
Kwa
kuzingatia mamlaka ya Tume (THBUB) yatokanayo na katika Katiba ya Jamhuri ya
Muungano wa Tanzania ya Mwaka 1977, hususani;
(a) Ibara ya 130(1)(a),(c), na (g) vya Katiba (1977), na
(b) kifungu Na.6 cha Sheria ya Tume (THBUB) na.7/2001
vinavyoipa Tume (THBUB) uwezo wa kisimamia, kuchunguza na kushauri kuhusu
masuala mbalimbali yanayohusu uvunjifu wa haki za binadamu na utawala bora,
na;
(c) baada ya kuzingatia Ibara za 119 ya Katiba ya Zanzibar ya
Mwaka 1984 na Sheria ya Uchaguzi ya Zanzibar Sheria na 11 ya 1984, zinoeleza
majukumu ya Tume ya Uchaguzi ya Zanzibar (ZEC);
4. Ushauri
Baada ya
kupitia Ibara na vifungu mbali mbali vya Katiba zote mbili na sheria husika,
Tume (THBUB) imejiridhisha kwamba ina uwezo wa kuishauri Tume ya Uchaguzi ya
Zanzibar kuhusiana na masuala kadhaa yaliyojitokeza katika Tamko la Mwenyekiti
wa Tume ya Uchaguzi ya Zanzibar. Tume (THBUB) imetoa ushauri ufuatao kwa Tume
ya Uchaguzi wa Zanzibar (ZEC):
(i)
Ibara ya 21
ya Katiba ya Jamhuri ya Muungano wa Tanzania ya Mwaka 1977, na Ibara 21 ya Katiba ya Zanzibar ya mwaka
1984[1]
zikisomwa pamoja, zinatoa uhuru wa kila
raia kushiriki katika shughuli za uongozi wa Serikali kwa kupitia uwakilishi wa
kuchaguliwa na kuchagua kwa uhuru na haki.
(ii)
Kifungu cha
42(6) cha Sheria ya Tume ya Uchaguzi ya Zanzibar[2]
kinaipa Tume (ZEC) mamlaka ya kushughulikia matatizo ya uchaguzi na kuyapatia
ufumbuzi kwa utaratibu ulioanishwa katika kifungu hicho.
(iii)
Kifungu hiki
kinabainisha mamlaka ya Tume (ZEC) kutangaza matokeo ndani ya siku tatu na
endapo kuna matatizo yamejitokeza katika mchakato wa uchaguzi, Tume (ZEC)
inatakiwa kuyatafutia ufumbuzi, na baada ya hapo matokeo yatatangazwa ndani ya
siku tatu.
(iv)
Tume (THBUB)
imepitia sababu zilizotolewa na Mwenyekiti Jecha na kubaini kwamba mambo yote
yaliyotajwa yanaweza kutatuliwa iwapo Makamishna wa ZEC wataweka tofauti zao
pembeni, na wakafanya kazi kwa pamoja kwa nia njema.
(v)
Tume (THBUB)
inashauri kwamba tofauti ama kasoro za kiutendaji zilizotajwa zinaweza
kutatuliwa kwa kuhakiki waliopiga kura kwa mujibu wa daftari, na kwa kuzingatia
sheria zilizopo.
(vi)
Tume (THBUB) inapenda kumshauri
Mwenyekiti wa ZEC kutafakari upya uamuzi wake wa kufuta uchaguzi na matokeo
yake yote.
5. Hitimisho
Mwisho
kabisa Tume (THBUB) inapenda kusisitiza umuhimu wa kila mdau wa uchaguzi
kuzingata sheria, katika mchakato mzima, kwani bila kufanya hivyo misingi ya
utawala bora itakuwa imevunjwa, na hivyo inaweza kusababisha uvunjifu wa haki
za binadamu.
Tume (THBUB) iko tayari
kushirikiana na ZEC kuchunguza tuhuma zote zilizotajwa na Mwenyekiti Jecha na
kuzitafutia ufumbuzi wa haraka ili kulinda haki za binadamu na misingi ya
utawala bora.
Imetolewa
na:
(SIGNED)
Bahame Tom
Nyanduga
Mwenyekiti
TUME YA HAKI ZA
BINADAMU NA UTAWALA BORA
Hakuna maoni :
Chapisha Maoni