MAMLAKA YA MAWASILIANO KENYA YAZIMA MATANGAZO YA TV YA VITUO VINNE VIKUU KENYA

Watazamaji wa televisheni Jijini Nairobi nchini Kenya wamejikuta wakikabiliana na runinga zisizoonyesha kitu hapo jana baada ya mamlaka ya mawasiliano kuvamia vituo vinne vya televisheni na kuzima matangazo yake.

Wakiambatana na ulinzi mkali wa polisi, maafisa wa Mamlaka ya Mawasiliano Kenya waliangia kwa nguvu kwenye eneo la Limuru lenye mitambo ya kurusha matangazo ya analogi ya vituo vya NTV, QTV, Citizen TV na KTN na kuzima mitambo inayotoa matangazo kwa eneo la Nairobi.

Uamuzi huo wa Mamalaka ya Mawasiliano Kenya, unafuatia maamuzi ya mahakama yaliyotolewa Ijumaa, ambayo yamesisitiza Desemba 31, 2014 ndio ulikuwa mwisho wa televisheni zote Kenya kurusha matangazo yao Jijini Nairobi kwa njia ya analogi, na kutupilia mbali pingamizi lililowekwa na vituo vitatu.

Kuzimwa matangazo ya vituo hivyo vinne vya televisheni kumewanyima asilimia 90 ya wananchi wa Kenya wanaotegemea matangazo ya vituo hivyo kuangalia habari pamoja na vipindi vingine, na pia kumevunja haki ya kikatiba ya uhuru wa kupata habari bila malipo.