MANCHESTER CITY, MAN U NA ARSENAL ZAPETA KOMBE LA FA

Wachezaji wa Manchester City, Sergio Aguero, Kelechi Iheanacho pamoja na Kevin De Bruyne wameiwezesha klabu yao kutinga raundi ya nne ya kombe la FA kwa kuifunga Norwich mbao 3-0.

Sergio Aguero alikuwa wa kwanza kuzifumania nyavu katika dakika ya 16, kisha Kelechi kuongeza la pili baada ya kugongeana vyema na mshambuliaji raia wa Argentina Aguero.

Kevin De Bruyne alihitimisha karamu ya magoli kwa kumfunga bao la tobo kipa John Ruddy katika dakika ya 78.

                          Sergio Aguero akipachika bao la kwanza kwa Manchester City 

                             Kelechi Iheanacho akipachika bao la pili la Manchester City

Nayo Manchester United ilipata ushindi wa mbinde wa bao 1-0 dhidi ya Sheffield United, kufuatia mpira wa penati uliopigwa na Wayne Rooney katika dakika ya 93, na kuiingiza Man U katika raundi ya nne ya kombe la FA.

                            Wayne Rooney akipachika bao pekee kwa mkwaju wa penati

Baadhi ya matokeo mengine ya Kombe la FA ni :- Wycombe 1 - 1 Aston Villa, Arsenal 3 - 1 Sunderland, Birmingham 1 - 2 Bournemouth, Brentford 0 - 1 Walsall, Bury 0 - 0 Bradford, Colchester 2 - 1 Charlton, Doncaster 1 - 2 Stoke, Eastleigh 1 - 1 Bolton, Everton 2 - 0 Dag & Red, Hartlepool 1 - 2 Derby, Huddersfield 2 - 2 Reading na Hull 1 - 0 Brighton.