NUSU FAINALI ZA LIGI YA UROPA: LIVEPOOL YATOTA UGENINI

Matumaini ya timu ya Liverpool kutinga fainali za Ligi ya Uropa kwa mara ya kwanza tangu kupita karibu muongo moja yamepata pigo baada ya Villarreal kuifunga goli moja katika dakika za majeruhi katika mchezo wao wa kwanza.

Katika mchezo huo Liverpool ilikaribia kupata goli pale shuti la chini la Roberto Firmino lilipogonga mwamba goli la Villarreal. Wakati mchezo huo ukionekana kuishia kwa sare tasa Adrian Lopez aliyetokea benchi akafunga goli akiunganisha pande la Denis Suarez.

Denis Suarez akiwapoteza mahesabu kipa wa Liverpool na beki Kolo Toure na kutoa pande la goli kwa Adrian Lopez

Wachezaji wa Liverpool Milner na Benteke wakishika viuno kuonyesha kukata tamaa baada ya kufungwa goli dakika za majeruhi

Katika mchezo mwingine wa nusu fainali wa Ligi ya Uropa mabigwa watetezi Sevilla ilitokea nyuma na kupata sare ya mabao 2-2 dhidi ya Shakhtar Donetsk katika mchezo wa kwanza uliopigwa huko Lviv.

Timu ya Sevilla, ambao ni washindi wa michuano hiyo mwaka 2014 na mwaka 2015, ilipata goli la kuongoza mapema kupitia Machin Perez kabla ya Marlos kuipatia Shakhtar Donetsk goli la kusawazisha.

Taras Stepanenko alipachika goli la pili kwa Shakhtar Donetsk, hata hivyo penati ya Kevin Gameiro katika dakika za mwisho iliweza kuipatia Sevilla sare muhimu.

             Taras Stepanenko akiwa angani akipiga mpira wa kichwa uliojaa wavuni