MBUNGE KENYA ATAKA WANAUME WASIOJIANDIKISHA KUPIGA KURA WANYIMWE UNYUMBA

Mbunge mmoja nchini Kenya amewataka wanawake walipo kwenye maeneo ambayo ni ngome kuu ya upinzani nchini humo kuwanyima unyumba wanaume wao ambao bado hawataenda kujiandikisha kupiga kura katika uchaguzi mkuu.

Mbunge huyo mwakilishi wa wanawake Mombasa, Bi. Mishi Mboko, amewaomba wanawake wenzake kuwanyima haki yao ya ndoa wanaume wao ili kuwalazimisha kwenda kujiandikisha kupiga kura katika uchaguzi wa Agosti 8.

Akiongea kwenye viwanja vya Jomo Kenyatta huko Mkomani, Mombasa ambako alitoa hundi kwa kikundi cha vijana, Bi. Mishi amesema kuwanyima unyumba wasiojiandikisha kutawafanya wanaume waharakishe kujiandikisha kupiga kura katika zoezi lililoanza jana.