MAREKANI YAONYA TISHIO LA SHAMBULIO LA UGAIDI KENYA

Majasusi wa Marekani wameonya kuwa kundi la wapiganaji wa Somalia la al-Shabaab huenda linapanga jaribio la kuishambulia Kenya.

Ulinzi umeimarishwa na jitihada za kukabiliana na ugaidi nchini Kenya zimeongezwa pamoja na nchi nyingine za Afrika Mashariki tangu tukio la mauaji kwenye jengo la Westgate Jijini Nairobi Septemba mwaka jana.

Hata hivyo Kamati ya Intelijensia ya Marekani imesema nchi za Afrika Mashariki zitapata muda mgumu kukabiliana na matukio mbalimbali ya majaribio ya kushambuliwa na magaidi.

Kundi la al-Shabaab pia limeelezwa kuwa linapanga mashambulio kwenye nchi za Burundi, Djibouti, Ethiopia pamoja na Uganda kutokana na nchi hizo kuwa na wanajeshi wake katika kikosi cha Umoja wa Afrika kilichopo Somalia.