CARLOS TEVEZ APIGA MBILI WAKATI JUVENTUS IKIITANDIKA BORUSSIA DORTUMUND 3-0 NA KUSONGA MBELE HATUA YA ROBO FAINALI LIGI YA MABINGWA ULAYA

NI JUVENTUS!! Timu ya soka ya Juventus toka Italia ikicheza ugenini nchini Ujerumani, usiku wa kuamkia leo wamejikuta wakiingia kwa kishindo katika hatua ya robo fainali ya ligi ya mabingwa barani Ulaya baada ya kuitandika bila huruma Borussia Dortmund kwa jumla ya mabao 3-0 katika mchezo ulioshuhudia kiwango cha hali ya juu cha mshambuliaji Carlos Tevez wa Juve.

Katika mchezo huo uliowanyamazisha kwa kipindi kirefu mashabiki wa Borussia Dortmund waliokuwa nyumbani, mabao ya wageni Juventus yaliwekwa kimiani na Carlos Tevez aliyefunga magoli mawili katika dakika za 3 na 80 za mchezo. 

Bao la pili liliwekwa nyavuni na Alvaro Morata katika dakika ya 70 baada ya kuitendea haki pasi murua toka kwa Carlos Tevez. 

Kwa ushindi huo, Juventus imesonga mbele kwa jumla ya mabao 5-1, kwani katika mchezo wa awali Juve walishinda kwa jumla ya mabao 2-1.

Mashabiki wa Juventus waliosafiri kutoka Italia kuishangilia timu yao wakiwa wenye furaha kufuatia timu yao kufuzu kwa hatua ya robo fainali ya ligi hiyo ya mbaingwa barani Ulaya.

Mwaka wa tabu!! Kocha wa Borussia Dortmund, Jurgen Klopp akiangalia timu yake ikipata kipigo nyumbani.