MAMLAKA YA MISRI YAWANYONGA WANAUME SITA WALIOTIWA HATIANI KWA KUWAUWA WANAJESHI

Mamlaka nchini Misri leo imewanyonga wanaume sita waliotiwa hatiani kwa kuwauwa wanajeshi, licha ya kuwepo kwa pingamizi linalodai kuwa wawili miongoni mwa hao walikuwa kizuizini wakati mauaji hayo yakitokea.

Mahakama ya jeshi ilikazia hukumu yao mwezi Machi, kufuatia kutiwa hatiani kwa watu hao sita katika kesi inayohusu kufanya mashambulizi baada ya jeshi kumg'oa madarakani rais Mohammed Morsi Julai 2013.

Waendesha mashtaka walisema watuhumiwa hao sita walikuwa ni wafuasi wa kundi la jihadi la Ansar Beit al-Maqdis lenye maskani yake katika eneo la Sinai, kundi ambalo limetangaza kushirikiana na Dola ya Kiislam (IS).