RAUL CASTRO AKUTANA NA PAPA FRANCIS NA KUMSHUKURU KWA UPATANISHI

Rais Raul Castro wa Cuba amepata fursa ya kuongea na kiongozi wa kanisa katoliki duniani Papa Francis ambaye aliyefanikisha kurejesha hivi karibuni uhusiano baina ya Cuba na Marekani.

Castro amemshukuru Papa Francis kwa jitihada hizo za upatanishi, na kusema ataanza kuomba na kurejea kanisani, iwapo Papa Francis ataendelea na jitihada zake hizo.

Kiongozi huyo wa Cuba alipitia Rome nchini Italia, baada ya kuhudhuria maadhimisho ya ushindi wa vita vikuu vya pili vya dunia yaliyofanyika Jijini Moscow nchini Urusi.

Kanisa Katoliki limekuwa likiendelea na uhusiano na Cuba tangu mwaka 1959, na sasa Papa Francis anatarajiwa kupitia Havana wakati akienda Marekani mwezi Septemba, mwaka huu.