MVUTANO WA KUKAA MITA 200 KUTOKA KATIKA VITUO VYA KURA WATINGA MAHAKAMA KUU

Mgombea wa Ubunge Viti Maalum katika jimbo la Kilombero kwa tiketi ya Chadema Amy Pascience amefungua chini ya hati ya haraka sana shauri namba 37 la mwaka 2015 katika Mahakama Kuu ya Tanzania kuomba mahakama itoe tafsiri sahihi ya kifungu namba 104 (1) cha sheria ya uchaguzi Tanzania itamke iwapo wapiga kura na watu wengine wenye shauku wanaruhusiwa au la kukaa kwa utulivu umbali wa mita 200 kutoka kituo cha kupigia kura ama cha kufanyia majumuisho ya kura.

Katika shauri hilo Mahakama kuu pia imeombwa kutamka iwapo ni halali kwa rais wa nchi kutoa matamko aliyoyatoa kwa namna ya katazo kwa wapiga kura ama raia wenye shauku kukaa kwa utulivu umbali wa mita 200 kutoka katika kituo cha kupigia kura ama cha kufanya majumuisho kungojea matokeo.

Akizungumzia juu ya shauri hilo lililofunguliwa leo na wakili Peter Kibatala kwa niaba ya mteja wake huyo, amesema aidha, katika shauri Mahakama Kuu imeombwa itamke iwapo rais ana mamlaka hayo kisheria kwa kuzingatia sheria ya uchaguzi Tanzania.